ed-Durreteyn

الدرتين1

الدرتين1

تأليف

يعقوب صنوع

أسماء الأشخاص اللاعبين

أحمد:

المسمى ملك.

بعجر:

المسمى وزير.

صابحة.

فطومة.

المنظر الأول

صابحة فقط

صابحة :

أما والله كل ما بافتكر كل ما عقلي ما بيجنن، قال بده يتجوز علي! والله ما يستاهل محبتي فيه. أما احنا يا نسا عبطة اللي بنآمن في الرجال. والحق علي أنا اللي ما انبسطتش وأنا صبية. يعني الضبط نابني منه إيه؟ هم الرجال يطمر فيهم؟ لاه لكن أنا بردي صابحة، وإن ما صبحتش عيشتهم زي الزفت ما ابقاش أنا شاربة من لبن أمي. معالهش من صبر نال، ولو ان الصبر موش في محله؛ لأن أنا مثلا بقالي خمستشر سنة متجوزة الملك زي ما بيسموه بني شداد أصحابه، ومريحاه على مراده من كله، وما اخلهش ناقص له حاجة. يدخل يلاقي بيته نضيف ظريف، وحلته على النار، وياكل ويشرب وينبسط أربعة وعشرين قيراط. ومع دا كله قال يروح يتجوز علي، يعني أنا موش مكفياه. أديني أنا مشا الله طول وعرض. والله أنا لما أحط الملاية على راسي وأتزوق وأنزل الغورية اشتري لي دراعين بفتة، تبقى كل الناس تبص لي وتقول دي جارية بيضة متخفية، والتجار يبقوا بدهم يوهبوا لي الدكاكين با اللي فيها على نظرة واحدة. أما صابحة بنت حرة. والله يا خسارتي في الحشاش دا اللي ما يعرف مقامي. أما أنا أفرجه مكر النسا. أهو جاي اسكتي يا بنت.

المنظر الثاني

ملك والمذكورة

ملك :

ما لك يا صابحة زعلانة؟

صابحة :

زعلانة! وازعل على إيه؟

ملك :

لا يعني بأقول كدا، أهو أنا خايف لتكوني منقهرة.

صابحة :

انقهر! وعلى إيه يا خي؟

ملك :

على العبارة إياها.

صابحة :

على الجوازة. يا خي لا، خلي قلبك في بطيخة صيفي. أنا ما اسألش.

ملك :

ما تسأليش إزاي بقى؟ ما تحبينيش على الكلام دا؟

صابحة :

بس أحبك إزاي وأنت تدخل علي درة.

ملك :

أما أنا والله ماني واخدها إلا على شان خاطر عينيك.

صابحة :

آدي اللي بده يرمح في غفلتي.

ملك :

أنا قصدي في راحتك؛ لأن فطومة دي بنت طيبة، وتبقى خدامة رجليك وأنت تفضلي ست بيتك.

صابحة :

يا ما هو قلبك طيب (في نفسها) : إن ما فرجتوا حاله أبقى بنت كلب.

ملك :

بقى أنا رايح أجيبهالك.

صابحة :

أهلا وسهلا.

ملك :

والله إنك بنت حلال، شوفي الحد والاتنين والتلات والاربع والخميس دول لك، والجمعة والسبت نخليهم للبنت المسكينة ولا نكسرش بخاطرها.